Bydd ein cadeirydd, Gareth Davies, yn ein gadael ar ôl ein Cyfarfod Cyffredinol Blynyddol y mis nesaf ac rwy’n gwybod y bydd llawer drwy rygbi Cymru, ar draws y gymuned a’r gêm broffesiynol, yn ymuno â mi i ddiolch yn swyddogol iddo am ei waith caled a’i ymroddiad dros y chwe blynedd diwethaf.
Pan ymunais ag Undeb Rygbi Cymru, fel cyfarwyddwr cyllid, yn 2007 yr oeddem mewn lle gwahanol. Prin bod y gêm ranbarthol yn bedair blwydd oed, roedd un Gamp Lawn y Chwe Gwlad yn disgleirio mewn tua 30 mlynedd o dywyllwch, ac eithrio teitlau a enillwyd yn ’88 a ’94, ac roedd ein stadiwm genedlaethol yn dal i fod yn ased yr oedd angen ei wireddu’n llawn.
Heb adrodd am dair blynedd ar ddeg o symudiadau i fyny ag i lawr, cyflawniadau a chamau’n ôl, cynnydd a brwydrau, rwy’n credu ei bod yn fwy na theg dweud bod yr hanner dwsin mlynedd diwethaf dan stiwardiaeth Gareth wedi gweld cynnydd cyson o ran llwybr rygbi Cymru ar lefel gymunedol a phroffesiynol.
Mae Gareth yn ein gadael mewn cyflwr da, mae llawer o waith caled i’w wneud o hyd, ond credaf yn gryf y bydd hanes yn ei gofio fel un o bennau ac arweinwyr gorau’r Undeb.
Wrth siarad am arweinyddiaeth, rhaid i mi hefyd fanteisio ar y cyfle hwn i ddiolch yn ffurfiol i Martyn Phillips am ei wasanaeth diysgog i’n gêm. Bydd y newid imi gymryd yr awenau fel prif weithredwr o ddydd i ddydd yn cael ei gwblhau yr wythnos hon, er y bydd Martyn wrth law am y mis neu ddau nesaf i fynychu cyfarfodydd amrywiol gyda’r Bwrdd a’r pwyllgorau, gan gadw ymrwymiadau presennol gyda Rygbi’r Byd, er enghraifft
Mae Martyn wedi diffinio’r strategaeth ar gyfer rygbi Cymru, o’r brig i’r gwaelod, yn ystod ei gyfnod a gobeithiaf godi o’r lle mae’n gadael. Gwelaf, yn fy nghweithredoedd cyntaf fel prif weithredwr dros dro, gyfrifoldeb i ddarparu sefydlogrwydd a pharhad mewn cyfnodau o newid i bob un ohonom.
Mae newidiadau ar fin digwydd ar lefel Bwrdd, gyda chadeirydd newydd bellach yn anochel, ac fel yr ydym yn croesawu Ieuan Evans yn dilyn ei ethol diweddar yr ydym yn clywed, yn ogystal, gan John Manders, a etholwyd hefyd i’r Cyngor cwpl o fisoedd yn ôl, isod. Gyda hyn mewn golwg, mae gan dîm gweithredol URC ddyletswydd i wylio, gwrando, deall ac amsugno dros yr wythnosau nesaf, ond rhaid inni hefyd gadw’r holl blatiau presennol yn troelli ar yr un pryd.
Mae’n bleser gennym gyhoeddi heddiw bartneriaeth saith mlynedd newydd gyda Macron, sy’n dod yn gyflenwr dillad technegol newydd i’n timau cenedlaethol a’n rhai llwybrau.
Mae mwy o fanylion am hyn yn y Diweddariad isod, ond digon yw dweud bod y bartneriaeth newydd hon yn un a fydd o fudd uniongyrchol i’r gêm gymunedol drwy ddarparu cit i dimau cymunedol mewn niferoedd sylweddol yn y tymor sy’n dechrau yn 2021/2.
O safbwynt masnachol, mae hwn yn un plât yr ydym wedi’i gadw’n troi’n gadarn mewn cyfnod anodd. Un arall yw’r gêm ryngwladol. Gyda chyhoeddiad Cwpan y Cenhedloedd Hydref yr wythnos diwethaf, bydd yn rhwystredig i bawb nad ydym eto wedi gallu cyhoeddi lleoliadau ar gyfer y gemau hyn na’n gȇm Chwe Gwlad a aildrefnwyd gyda’r Alban, ond, fe’ch sicrhaf, nid yw neb yn teimlo’r rhwystredigaeth hon yn fwy felly na ni. Mae’n newyddion hynod gadarnhaol i fod wedi cadarnhau y bydd y gemau hyn yn cael eu chwarae ac, fel y dywedasom, gobeithiwn chwarae ein gemau cartref mewn lleoliad yn Llundain os caniateir torfeydd. Mae hyn er mwyn sicrhau’r refeniw mwyaf sy’n angenrheidiol tra bod Stadiwm y Principality yn cael ei ddefnyddio fel Ysbyty Calon y Ddraig.
Mae gennym newyddion mwy cadarnhaol hefyd parthed y stadiwm gyda Bwrdd Iechyd Prifysgol Caerdydd a’r Fro yn cadarnhau’r wythnos hon y byddant yn dechrau dadgomisiynu’r ysbyty yn barod i’w roi yn ôl ym mis Hydref. Wrth gwrs, mae ein staff tir yn hynod, hynod barod i ddechrau’r broses o ddychwelyd ein harwyneb chwarae i’w gyn ogoniannau ac mae ein gemau cartref Chwe Gwlad yn 2021 bellach wedi’u gwarantu i ddychwelyd i Gymru – gyda thorfeydd gobeithio!
Fe’ch gadawaf gyda llongyfarchiadau cadarn i Ieuan Evans ar ennill yr etholiad i Gyngor URC, swydd y bydd yn ei chymryd ar ôl y CCB y mis nesaf, a hoffwn hefyd groesawu Tim Moss i fwrdd gweithredol URC. Mae Tim yn gyfrifydd siartredig cymwysedig a graddiodd o Brifysgol Durham ac mae’n camu i fyny o’i rôl fel rheolwr ariannol Grŵp i swydd Cyfarwyddwr Cyllid Dros Dro.
Ac yn olaf, rwy’n gobeithio, sicrwydd: Rwy’n ymwybodol iawn fy mod yn ymgymryd â rôl Prif Swyddog Gweithredol y Grŵp ar adeg pan fo ein busnes o dan straen a phwysau enfawr. Fel cyfarwyddwr cyllid, rwyf wedi arfer bod yn llais o reswm absoliwt yn yr ystafell. Yr wyf yno i gydnabod realiti sefyllfa benodol, i wreiddio strategaeth mewn gwirionedd ac i gwtogi ar uchelgais a risg gyda niferoedd caled oer, ond fy rôl i hefyd yw galluogi cynnydd a hwyluso cyflawniad deinamig. Nid yw’r rhifau’n dywedyd anwiredd. Yr ydym yn cynllunio ar gyfer y sefyllfa waethaf bosibl ac yn cyllidebu ar ei gyfer ac yr ydym wedi gwneud hynny’n gyson. Fel hyn, pan fydd amseroedd yn gwella – a byddant yn gwneud hynny – byddwn yn y sefyllfa orau bosibl i godi unwaith eto ac i ddod â phawb gyda ni.
Mae’n anrhydedd imi ymgymryd â’r rôl o arwain ein chwaraeon cenedlaethol allan o’r argyfwng presennol hwn. Codaf i ble y gadawodd fy rhagflaenwyr nodedig. Byddaf yn cadw’r platiau i gyd yn sbinio ac yn edrych ymlaen yn awchus at weithio gyda chadeirydd nesaf URC i sicrhau y gallwn i gyd barhau i fod y gorau y gallwn fod, gyda’n gilydd.”
Yr eiddoch yn wylaidd,
Steve Phillips
Prif Swyddog Gweithredol interim Grŵp URC
(Datganiad i’r wasg) – MACRON NODDWR TECHNEGOL NEWYDD UNDEB RYGBI CYMRU
Heddiw, cyhoeddodd Undeb Rygbi Cymru bartneriaeth saith mlynedd proffil uchel newydd gyda’r gwneuthurwr nwyddau chwaraeon Macron.
Macron yw partner technegol swyddogol URC a bydd yn cyflenwi citiau dyddiau gȇm pwrpasol yn ogystal â dillad hyfforddiant llawn, a rhai teithio a hamdden, gan gynnwys ategion, i’w uwch dimau dynion, menywod a rhai llwybrau o fis Hydref ymlaen. Bydd Macron yn gwneud buddsoddiad enfawr pellach yng ngêm gymunedol rygbi Cymru drwy ddarparu gwerth £6m o gitiau dros gyfnod y fargen.
Bydd cit diwrnod gȇm newydd Cymru yn cael ei wisgo am y tro cyntaf yn erbyn Ffrainc mewn gêm gynhesu ym Mharis ar 24ain Hydref, ac yn mynd ymlaen i’w gwisgo yng gêm y Chwe Gwlad Guinness 2020 a aildrefnwyd yn erbyn yr Alban ar 31ain Hydref a Chwpan newydd yr Hydref ym mis Tachwedd a Mis Rhagfyr.
Bydd crysau newydd Cymru a chrysau wrth gefn, a fydd yn parhau i gario noddwr blaen crys Isuzu, yn cael eu dadorchuddio’n gynnar ym mis Hydref (Dyddiad i’w gadarnhau) wrth i ochr Wayne Pivac fynd i’r gwersyll cyn amserlen brysur yn yr hydref.
“Rydym yn falch o gyhoeddi’r cytundeb mawreddog hwn,” meddai Prif Swyddog Gweithredol Macron, Gianluca Pavanello – “Mae gan Undeb Rygbi Cymru hanes cyfoethog ym maes rygbi’r byd ac mae’n Undeb sy’n cynnwys cyfarchion anhygoel – ond, yn bwysicach, mae’n chwarae rhan sylfaenol yn niwylliant a chymdeithas Cymreig. Mae partneriaethau gyda’r Sgarlets a Gleision Caerdydd wedi rhoi gwerthfawrogiad i ni o’r cariad sydd gan gefnogwyr Cymru i’r gamp. Mae’r un cariad ac angerdd hwnnw’n tyfu hyd yn oed yn gryfach bob tro y bydd y tîm cenedlaethol yn dod i mewn i’r maes. Byddwn ni yn Macron yn cynnig ein cymhwysedd technegol, ein gallu creadigol ac ychydig o dalent Eidalaidd i Undeb Rygbi Cymru i ddatblygu eu cit diwrnod cyfatebol, eu llinellau dillad yn ogystal â chasgliad masnachol a fydd yn unigryw i’r genedl wych hon ac un y gobeithiwn fydd yn cipio calonnau chwaraewyr a chefnogwyr fel ei gilydd.”
Mae URC a chynhyrchwyr dillad chwaraeon sy’n seiliedig yn yr Eidal yn ceisio meithrin perthynas unigryw a fydd o fudd sylweddol i’r gêm gymunedol ac a fydd yn gweld Macron yn cyflenwi gwerth £6m o gitiau’n ystod y bartneriaeth ar draws y 300 o glybiau cymunedol ledled Cymru. Bydd y pecynnau cyntaf ar gael mewn pryd ar gyfer tymor 2021-22, gyda’r ddau barti yn gweithio ar y rhwydwaith dosbarthu ar hyn o bryd. Bydd hyn yn cynnwys darparu symiau credyd sylweddol ar gyfer cynhyrchion Macron i glybiau sy’n aelodau.
Darperir rhagor o fanylion yn ddiweddarach yn 2020 ond, yn fyr, bydd £1m mewn credyd ar gael ar draws y gêm gymunedol bob tymor am y chwe blynedd sy’n weddill o’r bartneriaeth Macron, o 2021.
“Rydym wedi cytuno ar bartneriaeth unigryw a blaengar gyda Macron nid yn unig i gyflenwi dillad tîm a hamdden i’n carfan genedlaethol, ond i ddarparu cynnig amhrisiadwy i’n gêm gymunedol yn eu hail dymor gyda ni a thu hwnt,” meddai Prif Swyddog Gweithredol URC, Steve Phillips. “Mae Macron yn deall pwysigrwydd y gêm gymunedol yng Nghymru a, gyda’n gilydd, rydym yn benderfynol o sicrhau bod y sefyllfa hon hefyd yn elwa ar y gytundeb gydweithredol fasnachol newydd hon.
“Mae Macron yn wneuthurwr citiau aml-chwaraeon uchel ei barch sydd ar fin dathlu eu 50fed flwyddyn yn y busnes ac sydd eisoes yn gweithio gyda llu o dimau ardderchog ledled y byd.
“O sail sy’n cynnwys Rygbi’r Alban a rygbi’r Eidal yn ogystal â’r Sgarlets a Gleision Caerdydd gyda thri chlwb arall yn y Guinness Pro14 a thri thîm yn y Top14 ac Uwch Gynghrair Lloegr fel ei gilydd, maent yn gwmni gyda phedigri sy’n ceisio ehangu ym maes chwaraeon y byd ac rydym yn edrych ymlaen yn fawr at barhau â’n twf ein hunain ochr yn ochr â hwy dros y saith mlynedd nesaf.”
Mae’r partner blaenorol Under Armour wedi cyflenwi tîm rygbi Cymru ers 2008, ond – am y tro cyntaf ar gyfer rygbi Cymru, a achoswyd gan y pandemig Covid-19 – bydd Cymru, i bobpwrpas, yn newid partner technegol swyddogol yng nghanol twrnamaint pan fyddant yn mynd i’r maes ym mis Hydref ar gyfer y gȇm y Chwe Gwlad 2020 a ohiriwyd gyda’r Alban.
“Tyfodd Under Armour a rygbi Cymru yn sylweddol gyda’i gilydd yn ystod y 12 mlynedd diwethaf a hoffem ddiolch i UA a’u gweithwyr ledled y byd am yr holl gefnogaeth yn ystod partneriaeth wirioneddol wych,” ychwanegodd Phillips. “Ond nawr, edrychwn ymlaen at bartneriaeth newydd gyffrous gyda Macron, sy’n dod â llawer iawn o fudd posibl i’r gêm ryngwladol a chymunedol.”
Mae’r holl wisgoedd technegol y bydd y tîm yn eu gwisgo yn y tymor sydd i ddod yn ganlyniad i ymchwil a datblygu gan ddylunwyr Macron a bydd pob un ohonynt yn cael eu nodweddu gan eicon brand yr Eidal: yr Arwr Macron.
Mae’r logo’n cynrychioli’r corff dynol ac yn cymryd ysbrydoliaeth o flaen y waywffon, drwy ddiffiniad yn ddatganiad o ddynamiaeth a chyflymder. Mae’r Arwr Macron yn symbol hyd yn oed yn fwy effeithiol o’r llawenydd ar ddiwedd yr her, cyflawniad targed, ymdrech, angerdd a phenderfyniad. Athroniaeth Macron: “Gweithio’n galed. Chwarae’n galetach.”
Mae Macron wedi dod yn arweinydd ym myd rygbi rhyngwladol ers tro byd. O ran Ffederasiynau a thimau cenedlaethol, Macron yw noddwr technegol yr Eidal, yr Alban, Portiwgal, Canada a’r Almaen, ac ar lefel clwb yn y DU mae’r rhestr yn cynnwys: Newcastle Falcons, Northampton Saints, Glasgow Warriors, Rygbi Caeredin, ac wrth gwrs y timau Cymreig Sgarlets a Gleision Caerdydd. Yn Ffrainc: Section Paloise, LOU Rygbi, Biarritz Olympique Pays Basque. Macron hefyd yw noddwr technegol dyfarnwyr Guinness Pro14.
Governance news
DS gallwn gadarnhau, oherwydd ystyriaethau iechyd a diogelwch ac anghenion ymbellhau cymdeithasol sy’n parhau o gofio am y pandemig Covid-19, y cynhelir Cyfarfod Cyffredinol Blynyddol nesaf URC yn rhithiol, ar noson o’r wythnos yn ystod wythnos olaf mis Hydref. Bydd y dyddiad yn cael ei bennu’n derfynol a bydd rhagor o wybodaeth am y trefniadau ar gyfer mynediad rhithwir yn dilyn yn fuan.
Etholwyd Ieuan Evans MBE yn Aelod o Gyngor Cenedlaethol URC gan glybiau sy’n aelodau, gan ennill pleidlais dair ffordd yn erbyn y deiliad Gareth Davies a Nigel Davies.
Bydd deiliadaeth Evans yn dechrau ar ôl diwedd y Cyfarfod Cyffredinol Blynyddol nesaf ym mis Hydref, sef crynhoad a fydd bellach yn weithred olaf fel Cadeirydd URC ar gyfer Davies – sy’n gadael ar ôl gwasanaethu dau dymor ar y Cyngor a’r Bwrdd ar yr un pryd, sef chwe blynedd wrth arwain rygbi Cymru.
“Mae’n anrhydedd enfawr cael eich dewis gan glybiau sy’n aelodau i’w cynrychioli ar Gyngor URC a byddaf yn gwneud popeth o fewn fy gallu i wobrwyo’r ffydd y maent wedi’i dangos ynof,” meddai cyn chwaraewr i Quins Caerfyrddin, Llanelli, Caerfaddon, Cymru ac asgellwr Llewod Prydain ac Iwerddon, Evans, sydd wedi creu gyrfa llysgenhadol a chyfryngol nodedig ers iddo ymddeol o chwarae.
“Mae’r gêm gymunedol yn hanfodol i iechyd a lles cyffredinol ein chwaraeon cenedlaethol ac ar y sylfeini hyn y dylem adeiladu ein dyfodol.
“Er bod yn rhaid i ni herio, gwerthuso ac adolygu’n gyson hoffwn ddiolch hefyd i Gareth am ei ymroddiad yn ystod ei gyfnod ar y cyngor a’i wasanaeth i rygbi Cymru dros flynyddoedd lawer.”
Yn ei gyfarfod yn dilyn y CCB bydd Cyngor URC sydd gydag 19 aelod, yn ethol neu’n ailethol pedwar o’i aelodau – gan gynnwys un o Aelodau’r Cyngor Cenedlaethol – i ymuno â Bwrdd Undeb Rygbi Cymru.
Yna, bydd y Bwrdd yn ethol cadeirydd newydd.
Mae gan Fwrdd URC gyfanswm o 12 aelod ac mae hefyd yn cynnwys Prif Swyddog Gweithredol URC a dau gyfarwyddwr anetholedig, anweithredol a chadeirydd y Bwrdd Rygbi Proffesiynol (BRP).
Yn ôl yn y gȇm
Mae Undeb Rygbi Cymru wedi gweithio gydag Ysgol Cnocio Caled i’ch helpu i gael ‘Yn ôl yn y Gêm’ ac i gyflogaeth. Mae gan elusen SOHK dîm o arbenigwyr a fydd yn darparu cyfres o gyrsiau dwys am ddim, sy’n cael eu rhedeg ar-lein dros bum niwrnod. Mae’r cwrs yn addas ar gyfer unrhyw un sy’n gysylltiedig â rygbi Cymru sydd wedi colli ei swydd oherwydd y pandemig covid – chwaraewyr gwrywaidd neu fenywaidd, hyfforddwyr, dyfarnwyr, gwirfoddolwyr neu rieni i chwaraewyr. Gallai’r cwrs hwn roi’r hwb sydd ei angen i aelodau’r teulu rygbi i fynd yn ôl i’r farchnad swyddi.
Newyddion rygbi
MANDERS DDAU FIS I MEWN
John Manders sydd â’r llygaid mwyaf ffres yn ystafell y bwrdd ar ôl ennill etholiad i Gyngor Cenedlaethol Undeb Rygbi Cymru ychydig dros ddau fis yn ôl.
Felly, sut beth yw cerdded ar hyd coridorau pŵer ym Mhencadlys URC, serch yn rhithiol?
Agorwyd llygaid ffres Manders tra’n cofleidio popeth sydd gan ei rôl newydd i’w gynnig ac mae ymuno â gwaith ar Strategaeth Rygbi Gymunedol newydd, yn arbennig, wedi ei roi ar wraidd materion o’r cychwyn cyntaf.
“Bydd y strategaeth newydd hon yn gadarnhaol iawn i’r gêm gymunedol,” meddai.
“Mae’r broses ymgynghori wedi bod yn gynhwysfawr a dylid canmol Geraint John a’i dîm am y gwaith a’r broses ymgynghori hyd yma a byddwn yn parhau i esblygu’r strategaeth mewn ymgynghoriad â chlybiau sy’n aelodau, sy’n hynod bwysig.”
Darllener mwy yma:
EDWARDS YN ATEB GALWAD I ARWAIN MENYWOD CYMRU
Cadarnhawyd bod Darren Edwards yn Hyfforddwr Arweiniol dros dro i gêm y Chwe Gwlad Merched Cymru a aildrefnwyd yn erbyn yr Alban (penwythnos dydd Sadwrn 31ain Hydref).
Bydd prif hyfforddwr dynion Saith Pob Ochr Cymru sydd wedi hyfforddi Caerfaddon, Dreigiau a Chymru Dan20 o’r blaen, yn cael cymorth gan Chris Horsman, Geraint Lewis a Gareth Wyatt i baratoi’r garfan ar gyfer y gêm hon flwyddyn cyn Cwpan Rygbi’r Byd nesaf yn Seland Newydd.
Mae carfan gref o 35 wedi’i henwi sy’n cynnwys un chwaraewr heb ei chapio yn y blaenwr, Laura Bleehen.
Canfyddwch fwy yma:
RYGBI WEDI’I OHIRIO YN SIR CAERFFILI
Ar ôl cael canllawiau ychwanegol gan Lywodraeth Cymru, ac yn unol â hyn, mae’r holl hyfforddiant rygbi cymunedol yn ardal Cyngor Bwrdeistref Sirol Caerffili wedi’i atal ar unwaith hyd nes y rhoddir rhybudd pellach.
Mae hyn yn golygu na fydd unrhyw weithgaredd hyfforddi rygbi clwb na Hwb Menywod wedi’i gymeradwyo yn ardal Cyngor Bwrdeistref Sirol Caerffili tra bo’r mesurau arbennig hyn ar waith.
Er ein bod yn cydnabod bod ysgolion yn aros ar agor, nid ydym am i rygbi chwarae rhan mewn trosglwyddo cymunedol, a’n blaenoriaeth yma yw lles chwaraewyr ac iechyd y cyhoedd.
Mae ein clybiau wedi bod yn amyneddgar ac yn wydn hyd yma, a gwyddom y byddwch am chwarae eich rhan i helpu’r cymunedau lleol i ddychwelyd i’r arferol cyn gynted ag sy’n bosibl.
Mwy yma:
TURNBULL YN CAMU I FYNY
Mae Josh Turnbull, dyn rheng ôl Gleision Caerdydd, yn paratoi ar gyfer bywyd ar ôl chwarae drwy weithio ei ffordd i fyny’r ysgol hyfforddi.
Ar ôl cael profiad blaenorol yn helpu Academi’r Sgarlets ar Dan 18, Gleision Caerdydd Dan 18 a chlwb ei dref gartref Castellnewydd Emlyn, mae chwaraewr rhyngwladol Cymru yn camu ymlaen i rôl gyda blaenwyr tîm Quins Caerfyrddin yn yr Uwch Gynghrair y tymor nesaf.
“Rwyf wedi bod yn ymwneud â hyfforddi ers wyth mlynedd bellach. Dechreuodd y cyfan pan oeddwn yn y Sgarlets ac mae wedi symud ymlaen o’r fan honno,“, meddai Turnbull sy’n 32 oed.
Darllenwch ymlaen yma
GALARU UN O’N HUNAIN – MIKE GIBBONS
Mae rygbi Cymru’n galaru ar golli un o’i brif swyddogion cymunedol mawr niferus, cyn ysgrifennydd a Chadeirydd Clwb Rygbi Ffynnon Taf, Mike Gibbons.
Collodd Mike ei frwydr fer yn erbyn cancr dros y penwythnos a bydd colled fawr ar ei ôl yn y clwb y bu’n gwasanaethu am hanner canrif, ac yn Stadiwm y Principality, lle bu’n gweithio i ddechrau fel Arweinydd Taith Safle, ac yna fel rheolwr y Teithiau ac yn olaf fel rhan o’r Staff Diogelwch.
Roedd ei wên heintus, ei frwdfrydedd di-ben-draw dros bob peth rygbi a phersonoliaeth ddiddorol yn ei wneud yn llysgennad perffaith ar gyfer y gêm yr oedd yn ei charu a’r stadiwm.
Cafodd degau o filoedd o ymwelwyr â chartref rygbi Cymru dros y 30 mlynedd diwethaf fudd o’i wybodaeth a’i angerdd dros bopeth sy’n ymwneud â’n chwaraeon cenedlaethol.
Mwy am Mike yma:
