Tra bod colli gartref yn erbyn Yr Alban wedi bod yn siom yng ngêm gynta’r ymgyrch, ‘roedd perfformiad Cymru’n erbyn Lloegr yn dangos gwir addewid. Er mwyn cael unrhyw obaith o efelychu camp y tymor diwethaf o orffen yn y trydydd safle – mae curo Iwerddon yng Nghorc y penwythnos yma’n gwbl angenrheidiol.
Dywedodd Abbie Fleming: “Mae gennym bac cryf ac ‘ry’n ni’n credu y gallwn ddefnyddio hynny’n effeithiol yn erbyn y Gwyddelod ddydd Sadwrn.
“Mae’r dyfnder yn ein carfan yn cryfhau sy’n golygu bod gennym ferched ar y fainc erbyn hyn sy’n gallu dylanwadu ar y chwarae pan maen nhw’n cael eu galw i’r maes.
“Ry’n ni gyd yn siomedig ein bod wedi colli’r ddwy gêm gyntaf – yn enwedig felly’n erbyn Yr Alban – ond ‘roedd digon o addewid yn ein perfformiad yn erbyn Lloegr i gynnig gwir obaith a hyder i ni.
“Mae’r hyder hwnnw wedi bod yn amlwg wrth i ni ymarfer ers yr ornest yn Ashton Gate.”
Mae rygbi menywod yn Iwerddon wedi cryfhau’n sylweddol yn ystod y blynyddoedd diwethaf ac fel Cymru – mae gan nifer fawr o’r garfan bresennol gytundebau proffesiynol bellach.
Mae canran uchel o’r garfan hefyd wedi bod yn cystadlu yn yr Her Geltaidd a’r Gwyddelod enillodd y WXV3 yn ddiweddar.
Er iddynt golli o 38-17 yn Ffrainc yn eu gêm agoriadol yn y Chwe Gwlad eleni – ‘roedd nifer wedi darogan colled dipyn trymach na hynny cyn y gic gyntaf – sy’n arwydd o ddatblygiad diweddar y garfan.
Yn eu hail gêm o’r Bencampwriaeth – fe sicrhawyd pwynt bonws wrth golli o 27-21 yn erbyn Yr Eidal yn Nulyn o flaen torf arbennig o 6,505.
‘Roedd tîm Sam Monahan ar ei hôl hi o 15 pwynt gydag 20 munud yn weddill – ond wrth berfformio’n gryf yn ystod y chwarter olaf – fe sicrhawyd y pwynt bonws gwerthfawr hwnnw wrth orffen o fewn chwe phwynt i’r Eidalwyr.
Er bod Iwerddon bellach wedi colli eu 7 gêm ddiwethaf yn y Bencampwriaeth does dim amheuaeth eu bod yn cryfhau fel carfan ac y byddant yn cynnig gwir her i Gymru ddydd Sadwrn.
Ychwanegodd Abbie Fleming:”Er bod Iwerddon wedi cryfhau ymysg eu blaenwyr – ein bwriad ni yw defnyddio ein goruchafiaeth yn yr agweddau hynny o chwarae i sicrhau ein bod ar y droed flaen.
“Byddwn wedyn yn gallu lledu’r bêl a dangos ein doniau ymosodol fydd gobeithio yn sicrhau ein buddugoliaeth gyntaf o’r Chwe Gwlad eleni.”
