Pêl-droed oedd cariad cyntaf wythwr y Dreigiau a Chymru pan oedd yn tyfu i fyny ac roedd yn ddigon da i chwarae gydag academi’r Adar Gleision pan oedd yn 10 oed hyd nes ei fod yn 16eg.
Rhoddodd y profiadau hynny sylfaen dda iddo ar gyfer dod yn gampwr proffesiynol – ond rygbi aeth â’i fryd yn y pendraw.
Patrick Vieira, oedd ei arwr ym myd y bêl gron – ond mae Aaron Wainwright wedi gwneud ei farc ar fyd y campau’n bendant ei hun hefyd – wrth chwarae mewn dau Gwpan y Byd a bod yn aelod allweddol o garfan Cymru enillodd y Gamp Lawn yn 2019. Do wir – fe elwodd rygbi ar golled pêl-droed.
Dywedodd Aaron Wainwright: “Ro’n i’n chwarae yng nghanol y cae i ddechrau ond symud yn ôl i gyfeiriad yr amddiffyn fu fy hanes. Mae gen i nifer o luniau gyda’r gwahanol dimau rhwng 10-16 ac ‘rwy’n dal i’w trysori.
“Fe ddes i drwodd gyda chwaraewyr fel Regan Pool a Mark Harris, ac roedd Rabbi Matondo flwyddyn ar ein hôl ni. Maen nhw i gyd wedi gwneud yn dda iawn yn eu gyrfaoedd.
“Roedd rhannu’r cyfleusterau ymarfer gyda’r prif dîm yn brofiad gwerthfawr iawn i mi gan ei fod yn agoriad llygad go iawn ar yr hyn sydd ei angen i fod yn chwaraewr proffesiynol.
“Cael fy rhyddhau oedd fy hanes yn y diwedd – ac fe benderfynais ganolbwyntio ar fy ngwaith ysgol – cyn deall mod i’n gallu chwarae rygbi’n reit dda.”
Mae Wainwright eisoes wedi bod i Stadiwm Dinas Caerdydd unwaith y tymor hwn i wylio’r Adar Gleision yn chwarae Caerlŷr. Nawr mae’n gobeithio arwain y Dreigiau at eu hail fuddugoliaeth dros y Scarlets y tymor hwn a hefyd ail-adrodd eu buddugoliaeth syfrdanol dros fois Parc y Scarlets ar Ddydd y Farn y llynedd.
Dywedodd Prif Hyfforddwr y Dreigiau, Dai Flanagan: “Roedd Dydd y Farn 2023 yn wych – yn dangos y gorau o rygbi Cymru. ‘Roedd yr awyrgylch yn arbennig hefyd. Os oes unrhyw ddiwrnod all ysbrydoli’r genhedlaeth nesaf i fwynhau rygbi rhanbarthol – Dydd y Farn yw hwnnw.
“Gan i ni golli yn erbyn y Gweilch y penwythnos diwethaf – byddai’n braf gorffen y tymor ar nodyn uchel yn erbyn y Scarlets. Byddai hynny’n rhoi hwb i bawb wrth i ni edrych ymlaen at yr haf a’r tymor newydd.
“Ein perfformiad yn erbyn y Scarlets y llynedd oedd ein gorau o’r holl dymor ac fe roddodd hynny hwb i’r holl garfan. Gobeithio y gallwn ail-adrodd y perfformiad a’r canlyniad hwnnw.”
