Hon oedd wythfed colled Cymru’n olynol ar y llwyfan rhyngwladol – y rhediad hiraf ers i garfan Warren Gatland golli’r un nifer o gemau o’r bron yn ôl yn 2012.
Daeth unig fuddugoliaeth Cymru yn erbyn Awstralia ar eu tomen eu hunain o driphwynt yn unig ar Faes Criced Sydney ym 1969 – a gobaith Dewi Lake a’i gyd-chwaraewyr oedd atal y rhediad siomedig o golli’r 11 gêm ddiwethaf yn erbyn y Wallabies ar dir Awstralia.
Yr ornest hon yn Sydney oedd gêm gyntaf Joe Schmidt wrth y llyw – a her gyntaf ei dîm newydd ers i Gymru chwalu’r Wallabies o 40-6 yng Nghwpan y Byd yn Lyon y llynedd.
‘Roedd capten newydd Awstralia Liam Wright, yn dechrau ei gêm gyntaf dros ei wlad ac ‘roedd Schmidt wedi dewis 7 o chwaraewyr heb gapiau yn y 23.
Ond mynd ar ei hôl hi’n gynnar wnaeth Wright a’i dîm wrth i Ben Thomas hollti’r pyst o 40 llath yn nhrydydd munud y gêm.
Bedwar munud wedi hynny, ‘roedd Noah Lolesio wedi gwneud pethau’n gyfartal gyda chic gosb syml o flaen y pyst.
‘Roedd James Slipper yn ennill cap rhif 135 i Awstralia heddiw – y prop gyda’r nifer fwyaf o gapiau erioed wrth iddo guro record Gethin Jenkins. Fe ddangosodd Slipper a’i gyd-flaenwyr eu grym yn sgrym gyntaf y gêm wedi 10 munud – ac fe roddodd Lolesio y Wallabies ar y blaen gyda’r gic gosb ddeilliodd o hynny.
Yn ystod chwarter agoriadol y gêm – fe hawliodd Awstralia 85% o diriogaeth yr ornest ac ar eu trydydd ymweliad â dwy ar hugain Cymru – fe hyrddiodd y cawr Taniela Tupou ei gorff sylweddol dros y llinell gais i gofnodi cais cyntaf y prynhawn. Ychwanegodd Lolesio y ddeubwynt a danfonwyd Gareth Thomas i’r cell cosb am drosedd cyn i Tupou dirio am ei gais.
Fe ddangosodd y Cymry wir gymeriad wrth i Thomas eistedd ar yr ystlys – ac yn dilyn cyd-chwarae effeithiol o lein ymosodol – dyfarnwyd cais cosb i’r Crysau Cochion a cherdyn melyn i’r blaenasgellwr Fraser McReight am geisio tynnu’r sgarmes symudol i’r tir. Dim ond triphwynt oedd rhwng y timau o’r herwydd gyda chwarter awr o’r cyfnod cyntaf ar ôl – ac felly’r oedd hi wrth droi o safbwynt y sgôr.
Hanner Amser Awstralia 13 Cymru 10
Er gwaethaf eu record simsan ar dir Awstralia, ‘roedd Cymru wedi curo’r Wallabies ym mhedair o’r pum gêm ddiwethaf rhwng y ddau dîm cyn heddiw – ac wedi dechrau hyderus i’r ail hanner – gydag Aaron Wainwright ar flaen y gad ar achlysur ei hanner canfed cap – fe holltodd Ben Thomas y pyst am yr eildro i’w gwneud hi’n 13-13.
Wythfed colled o’r bron i Gymru wrth i Aaron Wainwright ennill ei 50fed cap.
Symbylu Awstralia i ymosod wnaeth y ffaith bod Cymru wedi llusgo eu hunain yn gyfartal – ac wedi 11 munud o’r ail hanner – fe ddangosodd Filipo Daugunu ei gryfder a’i gyflymdra i sgorio ail gais ei wlad yn y gornel.
Yn union wedi hynny, camodd James Botham o’r fainc a gyda’i gyffyrddiad cyntaf o’r gêm ‘roedd yn credu ei fod wedi dod â Chymru’n gyfartal – ond ar achlysur ei brif gêm brawf gyntaf yn y canol – penderfynodd Pierre Brousset – bod Christ Tshiunza wedi troseddu yn y sgarmes symudol.
Gydag 17 o funudau’n weddill daeth Tom Lynagh i’r maes i ennill ei gap cyntaf dros y tîm cartref. Dylai’r cyfenw fod yn gyfarwydd gan fod ei dad Michael wedi ennill Cwpan y Byd gydag Awstralia – ac fe chwaraeodd ei frawd Louis dros Yr Eidal yn eu buddugoliaeth yn erbyn Cymru ym Mhencampwriaeth Chwe Gwlad Guinness eleni.
Ond Cymru gafodd sgôr nesa’r ornest wrth i gicio cywir Ben Thomas gau’r bwlch i ddeubwynt yn unig gyda chwarter awr o’r gêm ar ôl.
Chymerodd hi ddim yn hir i Lynagh wneud ei farc ar y llwyfan rhyngwladol gan i’w bas yn ddwfn o dir ei hun ryddhau cefnwr y Brumbies Tom Wright – ac wedi iddo osgoi tacl yr eilydd Nick Tompkins – ‘roedd rhwydd hynt ganddo at y llinell gais i hawlio trydydd cais Awstralia o’r noson.
Cofnododd Lynagh ei hun ei bwyntiau cyntaf ar y llwyfan rhyngwladol wrth iddo lwyddo’n hyderus gyda’r trosiad gydag ychydig dros 10 munud yn weddill i sicrhau’r fuddugoliaeth i’r Wallabies.
Colled siomedig arall i’r Cymry – ond bydd cyfle buan i dalu’r pwyth wrth iddynt deithio i Melbourne ar gyfer yr ail brawf y Sadwrn nesaf.
Canlyniad: Awstralia 25 Cymru 16
Wedi’r ornest dywedodd Capten Cymru Dewi Lake: “Mae’n rhaid i mi ganmol calon ac ymdrech ein bechgyn ni heddiw. Mae hynny am fynd â ni yn bell ymhen amser ond allwn ni ddim gadel gymaint o gyfleoedd lithro o’n gafael os y’n ni am ennill gemau.
“Roedd methu â chaniatáu cais James Botham yn drobwynt o safbwynt momentwm y gêm er mae’n rhaid i ni barchu penderfyniad y dyfarnwr.
“Ry’n ni’n garfan agos iawn at ein gilydd. Ry’n ni’n gwneud popeth o fewn ei gallu i sicrhau y byddwn ni’n gystadleuol ac yn ennill y gêm yr wythnos nesaf.”
Ychwanegodd Prif Hyfforddwr Cymru, Warren Gatland: “Fe frifon ni ein hunain wrth ildio’r meddiant yn rhy aml ond fe ddangoson ni gymeriad i aros yn gystadleuol trwy gydol y gêm.
“Roedd hi’n ornest gystadleuol a chorfforol ac er fy mod yn deall y pwysau sy’n dod yn sgîl y ffaith ein bod ar rediad gwael o ran canlyniadau – mae gennym lawer o addewid wrth i ni edrych ymlaen at Gwpan y Byd.”
