Yn dilyn cyfnod o ymchwilio a phendroni trylwyr wrth ystyried Sain Helen a Maes y Bragdy ym Mhen-y-bont ar Ogwr – penderfynwyd mai Abertawe oedd y lleoliad mwyaf addas ar gyfer y dyfodol.
Yn eu datganiad swyddogol, diolchodd y Gweilch i Gyngor Bwrdeistref Pen-y-bont am eu “cefnogaeth ragorol yn ystod ein cyfnod o ymchwilio.”
Eglurodd y Gweilch bod “symud i Sain Helen nid yn unig yn ein cadw’n agos at y rhan fwyaf o’n cefnogwyr a’n noddwyr, ond mae hefyd yn ein galluogi i weithio gyda Chyngor Dinas a Sir Abertawe i greu pennod newydd a chyffrous yn hanes maes enwog Sain Helen – y maes lle chwaraeodd Cymru eu gêm rygbi ryngwladol gyntaf erioed yn 1882.
“Bydd ein buddsoddiad gwerth miliynau o bunnoedd yn y safle yn golygu gosod cae 4G newydd, creu stondinau a siopau newydd, ailwampio adeilad y clwb, a chyflwyno ardal arbennig ar gyfer y cefnogwyr hefyd. Y nod yw cynnig profiad diwrnod gêm heb ei ail i gefnogwyr a datblygu cyfleoedd newydd ar gyfer digwyddiadau fydd yn sicrhau buddsoddiad pellach yn y clwb o ddigwyddiadau y tu hwnt i ddiwrnod gêm.”
Bydd Clwb Rygbi Abertawe a Phrifysgol Abertawe yn parhau i chwarae ar y maes, a gobaith y Gweilch yw cynnal nifer cynyddol o gemau cymunedol yn Sain Helen hefyd.
Mae Clwb Criced Abertawe wedi cael eu cynnwys yn y trafodaethau o’r dechrau’n deg, a bydd cyhoeddiad ynghylch ble y byddant yn chwarae eu gemau nhw yn y dyfodol yn cael ei wneud maes o law.
Dywedodd Lance Bradley, Prif Weithredwr y Gweilch: “Bydd symud i leoliad y byddwn yn gallu ei alw’n gartref yn newid popeth i bawb sy’n ymwneud â’r clwb – gan gynnwys chwaraewyr, staff, cefnogwyr a noddwyr.
“Mae ein buddsoddiad yn dangos ein hyder nid yn unig yn y cynlluniau sydd gennym ar y cae ac oddi arno, ond hefyd ein ffydd yn nyfodol rygbi Cymru a’r cynlluniau sy’n cael eu datblygu gan Undeb Rygbi Cymru.”
Mae Maes Chwaraeon Sain Helen yn eiddo i Gyngor Abertawe, sydd â chynlluniau uchelgeisiol i ddatblygu’r ardal gyfan yn barc chwaraeon elît.
Roedd Rob Stewart, arweinydd y cyngor, yn falch o benderfyniad y Gweilch i ddewis lleoliad arall yn Abertawe fel eu cartref newydd.
Dywedodd: “Rydym wrth ein bodd gyda chyhoeddiad y Gweilch; mae’n rhywbeth y bydd llawer o’r cefnogwyr yn gyffrous iawn yn ei gylch.”
Bydd y Gweilch yn parhau i chwarae eu gemau cartref yn Stadiwm Swansea.com yn ystod tymor 24/25 – cyn symud i’w cartref newydd y tymor canlynol.
