Y mewnwr Keira Bevan fydd yn gapten ar ei gwlad am y trydydd tro o’r bron ac fe fydd hi’n arwain tîm sy’n cynnwys y rhan fwyaf o’r garfan lwyddodd i guro’r Wallaroos am y tro cyntaf erioed yng Nghasnewydd y penwythnos diwethaf.
Mae’r bachwr profiadol Carys Phillips yn dychwelyd i’r rheng flaen. Gwenllian Pyrs a Donna Rose fydd yn propio gyda Natalia John a Georgia Evans y tu ôl iddynt yn yr ail reng.
Wedi iddi sgorio cais o’r fainc yn Rodney Parade nos Wener ddiwethaf bydd Alisha Butchers yn ymuno â Kate Williams a Bethan Lewis yn y rheng ôl o’r dechrau yn Cape Town.
Lleucu George sydd wedi ei dewis yn faswr gyda’r canolwr profiadol Kerin Lake a Carys Cox yng nghanol cae i Gymru.
Y cefnwr Jenny Hesketh, Jasmine Joyce a Nel Metcalfe fydd y tri ôl.
Os y caiff y prop Jenni Scoble ei galw o‘r fainc – bydd hi’n ennill ei chap cyntaf dros ei gwlad.
Dywedodd Ioan Cunningham, Prif Hyfforddwr Cymru: “Mae’r tîm yma’n dangos ein bod yn cryfhau’r gystadleuaeth am wahanol safleoedd ymhlith y garfan. ‘Dwi wedi dweud o’r blaen bod hynny’n un o’n blaenoriaethau.
“Bydd Awstralia ddim yn hapus ar ôl ein buddugoliaeth hanesyddol ni yn eu herbyn yn Rodney Parade, ac ry’n ni’n gwybod yn iawn y bydd ganddyn nhw bwynt i’w brofi yma yn Cape Town.
“Gallwn gymryd llawer iawn hyder o’r perfformiad yr wythnos ddiwethaf – a bydd angen i ni godi’n safonau hyd yn oed yn uwch ddydd Sadwrn – yn erbyn un o chwe thîm gorau’r byd wrth gwrs.
“Mae’n braf croesawu Hannah Jones ac Alex Callender yn ôl i garfan y gêm ac mae’r ffaith ein bod yn gallu eu galw nhw i’r maes yn dangos y dyfnder ry’n ni’n ei adeiladu.
“Er nad oedd Sisilia ar gael i’w dewis yn y rheng flaen, mae Donna Rose wedi bod yn ymarfer yn arbennig o dda ac mae hi’n haeddu’r cyfle hwn.
“Mae’r chwaraewyr i gyd yn gwybod bod cyfraniad pob un aelod o’r garfan yn allweddol wrth i ni geisio ennill gemau rhyngwladol. Mae pob unigolyn yn gwybod beth y mae’r tîm hyfforddi yn ei ddisgwyl ganddynt er mwyn gallu creu argraff bositif ar gêm brawf fydd y llawn angerdd a dwyster.
“Ry’n ni’n uchelgeisiol fel carfan a’r WXV2 fydd y prawf go iawn cyntaf fydd yn dangos ble ‘ry’n ni arni hi ar ddechrau tymor arbennig o bwysig a chyffrous.”
Nid yw’r prop Sisilia Tuipulotu ar gael i’w dewis o ganlyniad i oruchwyliaeth weinyddol i’w Fisa.
Tîm Cymru i wynebu Awstralia
Jenny Hesketh, Jasmine Joyce, Carys Cox, Kerin Lake, Nel Metcalfe, Lleucu George, Keira Bevan (capten); Gwenllian Pyrs, Carys Phillips, Donna Rose, Natalia John, Georgia Evans, Alisha Butchers, Kate Williams, Bethan Lewis
Eilyddion:
Molly Reardon, Abbey Constable, Jenni Scoble, Abbie Fleming, Alex Callender, Sian Jones, Kayleigh Powell, Hannah Jones
Gemau WXV2 Cymru
Awstralia v Cymru, Stadiwm DHL, Cape Town (11.30am), Dydd Sadwrn, Medi 28ain
Cymru v Yr Eidal, Stadiwm Athlone, Cape Town (3pm), Dydd Gwener, Hydref 4ydd
Cymru v Japan, Stadiwm Athlone, Cape Town (3pm), Dydd Gwener, Hydref 11eg
