Nid oedd y crysau cochion wedi llwyddo i drechu Awstralia yn eu chwe gêm flaenorol – ond llwyddwyd i gipio’r fuddugoliaeth yn amser yr amen yn Rodney Parade nos Wener.
Yn ystod hanner cyntaf hynod gystadleuol – fe hawliodd Maya Stewart gais i’r ymwelwyr ac fe groesodd capten Cymru ar y noson, Keira Bevan am y cyntaf o bum cais ei thîm.
Ar achlyusur dechrau ei gêm gyntaf dros ei gwlad bu’n rhaid i’r bachwr Rosie Carr adael y maes gydag anaf i’w hysgwydd wedi 25 munud. Daeth Molly Reardon i’r cae yn ei lle – ac fe lwyddodd hi i dirio ddwywaith. Eilydd arall, Alisha Butchers hawliodd gais arall y Cymry.
Croesodd Caitlyn Halse yn effeithiol dros y Wallaroos yn ystod yr ail gyfnod hefyd, cyn i sgôr hwyr Tabua Tuinakauvadra ymddangos ei bod wedi cipio gêm gyfartal i’w thîm a thawelu’r dorf o bron i 2000 yng Nghasnewydd.
Ond roedd amser am un ymosodiad arall gan y tîm cartref – ac fe brofodd y sgarmes symudol yn arf effeithiol unwaith yn rhagor – ac fe arweiniodd hynny at gais hwyr iawn Williams a dathliadau gorfoleddus ei chyd-chwaraewyr.
Bydd y fuddugoliaeth gyntaf hon mewn saith gêm yn erbyn Awstralia yn rhoi hyder mawr i Fenywod Cymru cyn cyfarfod y Wallaroos yn Ne Affrica’r wythnos nesaf.
Canlyniad: Cymru 31 Awstralia 24
Dywedodd Ioan Cunnigham, Prif Hyfforddwr Cymru: “Mae’r garfan yma wedi creu hanes drwy guro Awstralia am y tro cyntaf erioed – ac ‘rwy’n arbennig o falch ohonyn nhw. ‘Roedd y perfformiad yn gorfforol ac effeithiol ar y cyfan ac yn gosod sylfaen gadarn i ni ar gyfer her hyd yn oed yn fwy ymhen wythnos.”
