Bydd Mark Jones yn camu i swydd y prif hyfforddwr yn gynt na’r disgwyl – gan mai ar ddiwedd y tymor yr oedd i fod i gymryd yr awenau’n wreiddiol.
Mae Mark Jones yn gyn-asgellwr rhyngwladol gyda Chymru wrth gwrs ac yn gyn-hyfforddwr y Tîm o dan 20 Cenedlaethol.
Fe ymunodd Toby Booth gyda’r Gweilch yn 2020 ac fe enillodd Darian Gymreig y Bencampwriaeth Rygbi Unedig ddwywaith – yn 2021/22 a 2023/24.
O dan ei arweiniad, fe gyrhaeddodd y Gweilch Rownd 8 Olaf Cwpan Her Ewrop a gemau ail-gyfle’r cynghrair y tymor diwethaf.
Mewn datganiad, dywedodd rhanbarth y Gweilch: “Hoffwn ddiolch i Toby am ei ymroddiad a’i gyfraniad yn ystod ei amser gyda ni fel rhanbarth. ‘Rydym yn dymuno’r gorau iddo yn ei bennod nesaf a’r hyn ddaw wedi hynny hefyd.”
Bydd gêm gyntaf Mark Jones fel Prif Hyfforddwr y Gweilch yn dipyn o achlysur pan fydd yn croesawu ei gyn-glwb, sef y Scarlets, i Stadiwm Swansea.Com am 5.15pm ddydd Sadwrn.
