Fe gododd Gwalia i’r ail safle’n nhabl yr Her Geltaidd o ganlyniad i’w buddugoliaeth gofiadwy o 29-27 yn Stadiwm Hive y penwythnos diwethaf, tra bo Caeredin bellach yn y pedwerydd safle.
Bryonie King fydd yn arwain y tîm unwaith eto – ond mae wyth newid yr wythnos hon gyda dau newid o ran safle.
Bydd y chwaraewyr rhyngwladol Gwennan Hopkins (wythwr), Sian Jones (mewnwr) a Maisie Davies (prop) yn dychwelyd i’r pymtheg cychwynol yr wythnos hon. Cana Williams a Molly Wakely fydd yn ymuno gyda Davies yn y rheng flaen.
Bydd Lily Terry yn symud o’r rheng ôl i ymuno ag Alaw Pyrs yn yr ail reng.
O safbwynt yr olwyr – mae Rhodd Parry wedi ei dewis yn gefnwr a Courtney Greenway a Caitlin Lewis fydd ar y ddwy asgell.
Mae partneriaeth Kelsie Webster ac Anwen Owen yn y canol yn newydd a chyffrous. Nid yw’r profiadol Kerin Lake ar gael i’w hystyried o ganlyniad i anaf i’w choes.
Dywedodd Prif Hyfforddwr Gwalia Lightning, Catrina Nicholas-McLaughlin: “Bydd Caeredin eisiau talu’r pwyth yr wythnos hon wedi i ni eu curo ar eu tomen eu hunain y penwythnos diwethaf.
“Fe grëon nhw nifer o broblemau i ni yng Nghaeredin ond fe ddangoson ni wir gymeriad wrth amddiffyn a dipyn o ddawn wrth ymosod hefyd.
“Ry’n ni’n datblygu ein hunaniaeth a’n hathroniaeth fel Gwalia Lightning erbyn hyn ac mae hynny’n gyffrous.”
“Ry’n ni’n haeddu bod yn yr ail safle ar hyn o bryd – ond mae hynny’n golygu bod timau eraill yn mynd i godi eu gêm yn ein herbyn. Fe fydd hynny’n arbennig o wir am Gaeredin gan fod ganddynt gyfle buan i wneud yn iawn am eu colled y penwythnos diwethaf.
“Mae’n argoeli i fod yn gêm agored a chyffrous arall.”
Gwalia Lightning (v Caeredin)
Rhodd Parry, Courtney Greenway, Kelsie Webster, Anwen Owen, Caitlin Lewis, Carys Hughes, Sian Jones; Maisie Davies, Molly Wakely, Cana Williams, Lily Terry, Alaw Pyrs, Bryonie King (capten), Catrin Stewart, Gwennan Hopkins.
Eilyddion: Mollie Mae Crabb, Dali Hopkins, Danyelle Dinapoli, Lottie Buffery-Latham, Katie Bevans, Freya Bell, Carys Williams-Morris, Jenny Hesketh
