Bydd y Cymry yn teithio i Vannes i herio’r Ffrancod yn y Stade de la Rabine a bydd y gêm yn fyw ar S4C nos Sadwrn am 8.10pm.
Dyma fydd y tro cyntaf i dîm o dan 20 Cymru chwarae yn y stadiwm ers 2019. Fe chwaraeodd saith aelod o garfan bresennol Warren Gatland yn y golled honno chwe blynedd yn ôl. Un o’r rheiny oedd Joe Roberts, groesodd am gais dros y Cymry.
Mae Richard Whiffin wedi dewis pedwar cap newydd yn y pymtheg cychwynol, gan gynnwys mewnwr y Dreigiau Logan Franklin.
Clo Bryste Kenzie Jenkins a’r ddeuawd yn y rheng ôl – Deian Gwynne (Caerloyw) ac Evan Minto (Dreigiau) yw’r tri blaenwr fydd yn cynrychioli eu gwlad ar y lefel yma am y tro cyntaf.
Dywedodd Richard Whiffin: “Roedd dewis y tîm yn anodd iawn gan bod cymaint o chwaraewyr wedi ymarfer yn wych dros yr wythnosau diwethaf.
“Rwyf wedi dewis tîm cyflym, pwerus a dawnus a dyna fydd ein hathroniaeth ar gyfer y gêm nos Sadwrn.
“Mae gennym dipyn o brofiad yn y tîm hefyd a gyda syniadau newydd y bechgyn newydd, ‘rwy’n hyderus bod gennym gyfuniad da i gryfhau ymhellach fel carfan.”
Harry Beddall fydd yn arwain y tîm unwaith eto ac mae Richard Whiffin yn gobeithio y bydd blaenasgellwr Caerlŷr yn gosod safonau a sylfeini cadarn i weddill y garfan.
Ychwanegodd Whiffin: “Mae Harry’n chwaraewr rygbi deallus. Mae’n darllen y gêm yn gampus ac mae’n esiampl arbennig i weddill y bois – oddi ar y cae ond yn enwedig felly ar y maes chwarae.”
Efallai mai Ffrainc fydd y ffefrynnau ar gyfer yr ornest yn Vannes ond mae Richard Whiffin yn hyderus y gall ei garfan arddangos eu doniau nos Sadwrn:
“Yn amlwg bydd hi’n bwysig bod ein hamddiffyn yn drefnus – yn enwedig yn ardal y dacl. ‘Ry’n ni eisiau chwarae gêm gyflym ac ymosodol ond mae’n rhaid i ni chwarae’n ddeallus a gwneud yn siwr ein bod yn cicio’n gywir ar yr adegau iawn hefyd.”
Cymru D20 v Frainc D20, Sad 1af Chwef, Stade de la Rabine, 8.10pm
15 Scot Delnevo (Aberafan)
14 Harry Rees-Weldon (Dreigiau)
13 Elijah Evans (Caerdydd)
12 Steffan Emanuel (Caerdydd)
11 Aidan Boshoff (Bryste)
10 Harri Wilde (Caerdydd)
9 Logan Franklin (Dreigiau);
1 Ioan Emanuel (Caerfaddon)
2 Harry Thomas (Scarlets)
3 Sam Scott (Bryste)
4 Kenzie Jenkins (Bryste)
5 Nick Thomas (Dreigiau)
6 Deian Gwynne (Caerloyw)
7 Harry Beddall (Caerlŷr) Capt
8 Evan Minto (Dreigiau)
Eilyddion
16 Saul Hurley (Aberafan)
17 Louie Trevett (Bryste)
18 Jac Pritchard (Scarlets)
19 Tom Cottle (RGC)
20 Dan Gemine (Gweilch)
21 Carwyn Edwards (Met Caerdydd)
22 Harri Ford (Dreigiau)
23 Tom Bowen (Caerdydd))
