Fe enillodd Jones 95 o gapiau dros Gymru ac fe chwaraeodd mewn pum gêm brawf dros y Llewod. Enillodd y Gamp Lawn deirgwaith – dwy o’r rheiny o dan arweiniad Warren Gatland.
Ers ymddeol, mae wedi bod yn creu argraff hynod ffafriol fel hyfforddwr gyda’r Harlequins yn Lloegr ac mae’n mwynhau ei gyfnod dros dro yn ôl gartref gyda Chymru, ar gyfer eu hymgyrch yn y Chwe Gwlad.
Dywedodd Adam Jones: “Rwy’n caru bod yn ôl gyda charfan ryngwladol Cymru. Dyma’r tro cyntaf i mi fod yma’n hyfforddi wrth gwrs ac ‘rwy’n credu bod y chwaraewyr yn mwynhau cael presenoldeb gwahanol a llais newydd yn y sesiynau.
“Rwyf wedi gwneud yn dda ym Mharis ac wedi cael chwip dîn yno hefyd!
“Does dim amheuaeth ei fod yn lle anodd i ni ddechrau’n hymgyrch.
“Fe wnawn yn siwr y bydd yn rhaid i’r Ffrancod weithio’n galed ac effeithiol ym mhob agwedd o’r chwarae – ac mae gennym gynllun clir ar gyfer y gêm yn y Stade de France.
“Maen nhw’n fwy nag unrhyw dîm arall – yn bwydo oddi ar ymateb y dorf – a’n gwaith ni fydd gwneud yn siwr nad oes ganddyn nhw lawer i weiddi’n gadarnhaol amdano.”
Fe chwaraeodd Adam Jones mewn 43 o gemau’n y Chwe Gwlad ac enillodd y Gamp Lawn yn 2005, 2008 & 2012. Enillodd 28 o gemau’n y Bencampwriaeth a phrofodd un gêm gyfartal.
Chwaraeodd yn y Stade de France ar bedwar achlysur a llwyddodd i ennill yno ddwywaith.
Ychwanegodd Jones: “Mae Gats yn wych am ddod â thîm sy’n glos at ei gilydd mewn cyfnod byr o amser.
“Mae gennym dipyn o brofiad yn dychwelyd hefyd o ganlyniad i bresenoldeb Taulupe Faletau, Liam Williams a Josh Adams – ac mae gennym yr hyder a’r hunan-gred y gallwn wneud yn dda mas ym Mharis.
“Y peth pwysig yw cadw torf Stade de France yn dawel. Dyna ddywedodd Oliver Rred wrth Russell Crowe yn y ffilm Gladiator – ac mae hynny’n wir am gefnogwyr Ffrainc.
“Ry’n ni eisiau ennill ym Mharis – ac os nad yw’r chwaraewyr yn gwrando ar ambell i lais negyddol yn y wasg – fe fyddwn yn iawn.”
Gwnaeth Jones ei ymddangosiad olaf dros Gymru’n erbyn De Affrica yn 2014 – bum cap yn unig yn brin o’i ganfed. Er bod hynny’n brifo ar y pryd – mae bellach wedi maddau i Warren Gatland!
“Mae pob chwaraewr yn drist pan mae eu gyrfa yn dod i ben. ‘Doeddwn i ddim yn hapus ar y pryd ond mae Warren a fi’n deall ein gilydd yn iawn.
“Fe wnaeth gymaint i mi fel chwaraewr yn ystod fy ngyrfa – a fydden ni heb gael gyrfa gystal oni bai iddo fe fy ngwthio a fy ngwella fi dros y blynyddoedd.
“Fe fyddaf wastad yn ddiolchgar iddo am hynny ac ‘rwy’n arbennig o hapus cydweithio gydag ef nawr gan ei fod wedi cael gymaint o ddylanwad cadarnhaol ar fy nghyrfa ac fy mywyd.”
